`రాజకీయమంతా రే’వంతే’!
`హస్తంలో ఇది రేవంత్ హయామంతే!
`సీనియర్లందరికీ పొగే?
`సెగ తగిలిస్తేగాని కదలరని తెలిసే!
`ఒక్కరొక్కరినీ సాగనంపితేనే!
`ఎన్నికల నాటికి తనకు ఎదురులేకుండా వుండాలంతే!
`తన ఎజెండా మాత్రమే నడవాలంతే!
`నా అనుచరులకే టిక్కెట్లంతే!
`ఇదే ఫైనల్…ప్రశ్నిస్తే కోవర్టే!
`ఎదిరిస్తే సోషల్ మీడియాలో బెదిరింపే!
`వన్ మ్యాన్ షో…అంతే!
`రేవంత్ జోలికొస్తే ఇక అంతే..రాజకీయంగా అంతే!
గతంలో పది మందిని కలుపుకుపోయే నాయకత్వం కావాలే గాని, కెలుక్కుంటూ పోయే నాయకత్వం వద్దనేవారు. కాని ఇప్పుడు కాలం మారింది. రేవంత్ రెడ్డి లాంటి నాయకులకు అది కుదిలేలా లేకుండాపోతోంది. అందరికోసం సమయం కేటాయించడం కానిపనౌతోంది. అందరికోసం చూస్తూ కూర్చుంటే పనయ్యేలా లేకుండా వుంది. తన దర్శనానికి ఎల్ వన్, ఎల్ టూ అంటూ ఎన్ని విమర్శలొచ్చినా రేవంత్ తీరులో మార్పు రావడంలేదు. పైగా ఆయన వ్యవహార శైలిలో మరింత దూకుడే కనిపిస్తోంది తప్ప, వెనకడుగు లేకుండా చూసుకుంటున్నాడు. ఇక రాజకీయమంతా రేవంత్దే అన్నంతగా కాంగ్రెస్ రాజకీయాలను గుప్పిట్లో పెట్టుకుంటున్నాడు. పార్టీమీద పట్టు సాధిస్తున్నాడు. కాని ఇది పార్టీకి శ్రేయస్కరమా? కాదా? అన్నది ఇప్పటికీ అంతు చిక్కకుండా వుంది. కాంగ్రెస్ ఎమ్మెల్యేగా వున్న రాజగోపాల్రెడ్డి రాజీనామా చేసిన 48 గంటల్లో మునుగోడు నియోజకవర్గంలో పెద్దఎత్తున సభ నిర్వహణ అన్నది అంత సులువైన పని కాదు. అంతే కాదు కాంగ్రెస్లో అసమ్మతిని ఎదరుర్కొలేక పోయిన నాయకులే చరిత్రలో ఎక్కువగా కనిపిస్తారు. కాని అసమ్మతిని తొక్కేస్తూ రాజకీయం చేస్తున్న నాయకుడిగా మాత్రం రేవంత్ మిగిలిపోతాడని చెప్పడంలో సందేహంలేదు. ఒకనాడు కాంగ్రెస్ పార్టీలో రాజశేఖరరెడ్డి పాత్ర కూడా ఇలాగే వుండేది.
ఆయన 1980వ దశకంలోనే యువ నాయకుడిగా వున్నప్పుప్పుడే పిసిసి. అధ్యక్షుడయ్యాడు. కాని ఆయన ముఖ్యమంత్రి అయ్యేదాకా అసమ్మతి నేతగానే ముద్రపడ్డాడు. రాష్ట్ర రాజకీయాల్లో ఆయన క్రియాశీలకపాత్ర పోషించినా, ఆయనను రాష్ట్ర కాంగ్రెస్లో కాకుండా డిల్లీ కాంగ్రెస్కే పరిమితం చేశారు. కడపకు మాత్రమే పరిమితమయ్యేలా చేశారు. ఇక కాంగ్రెస్లో నాటి పరిస్ధితులల్లో సీనయర్ల ప్రస్తానం కూడా ఇంత నల్లేరు మీద నడకకాలేదు. వారి ముప్పు తిప్పలు పడిన సంరద్భాలే ఎక్కువ. ప్రతి సారి అధిష్టానానికి సంజాయిషీ చెప్పుకున్నవాళ్లే ఎక్కవ. కాని రేవంత్రెడ్డి ఒక రకంగా చెప్పాలంటే అదృష్టవంతువంతుడనే చెప్పాలి. ఆయనను వ్యతిరేకించిన వాళ్లంతా పార్టీని వదలాల్సి వస్తోంది. అవసరమైతే వదిలేలా చేయాల్సివస్తోంది. నోరు తెరిస్తేచాలు కోవర్టు అనే ముద్ర వేసి మరీ కాంగ్రెస్ శ్రేణుల చేత తిట్టించాల్సివస్తోంది. ఇది కూడా సీనియర్ కాంగ్రెస్ నేతల్లో ఒక రకమైన అంతర్మధనానికి దారి తీస్తోంది. అందరినీ సైలెంటుగా వుండేలా చేస్తోంది. అంతర్గత ప్రజాస్వామ్యం అన్నది నిన్నటిదాకా చెప్పుకున్న గొప్ప ఘనత లేకుండాపోతోంది. రేవంత్రెడ్డి పీసీసీ ప్రెసెడెంటు అయ్యే ముందు, అయిన తర్వాత చూసిన తుఫానును ఆయనను రాటుదేలా చేసిందా?
అన్న ప్రశ్న కూడా ఉత్పన్నమౌతోంది. ఇక సీనియర్ల ముందు చేతులు కట్టుకొని నిలబడినంత కాలం వాళ్లు గోడ కుర్చీ వేయించే ప్రయత్నం చేస్తారని తెలుసుకున్న రేవంత్ వారి నోటికి తాళం వేయడం మొదలుపెట్టాడు. అవసరాన్ని బట్టి పరుషమైన భాషను కూడా వాడుతూ, తన తనదైన శైలిలో సాగుతున్నాడు. సీనియర్ నాయకులైన కోమటి రెడ్డి బ్రదర్స్ విషయంలో వైన్స్ షాపు దగ్గర నుంచి మొదలుపెడితే పండబెట్టి తొక్కుతా? అన్నంత దాకా రేవంత్ మాట్లాడాడు. ఆఖరుకు వెంకటరెడ్డికి తెలియకుండానే, ఆయన ప్రమేయం లేకుండానే మునుగోడులో సభ ఏర్పాటు చేశాడు. సభ సక్సెస్ చేశాడు. వెంకట్రెడ్డి పెద్ద తోపేం కాదని నిరూపించే ప్రయత్నం చేయాల్సినంత చేశాడు. మునుగోడులో ఒక రకంగా కాంగ్రెస్కు పాజిటివ్ వాతావరణం సృష్టించాడు. కాంగ్రెస్ పార్టీ అక్కడ గెలుస్తుందా? లేదా? అన్నది పక్కనపెడితే, తన మాట చెల్లుబాటౌతుందా? లేదా? అన్నదే రేవంత్కు ముఖ్యమైపోయినట్లు కనిపిస్తోంది. హుజూరాబాద్ విషయంలోనూ ఇదే చేశాడు. ముందే అక్కడ చేతులెత్తేశాడు. స్ధానికేతరుడైన బల్మూర్ వెంకట్ను రంగంలోకి దింపాడు. ఓట్లు పడకుండా చేసుకున్నాడు. అయినా ఆయన తాను చేసింది తప్పు అని ఇప్పటికీ అంగీకరించడం లేదు. తాజాగా కోమటి రెడ్డి వెంకటరెడ్డి శుక్రవారం అన్ని మీడియా సంస్ధల ముందుకొచ్చి, తాను అలిగానని, భుజ్జగిస్తే ఆలోచిస్తానంటూ సన్నాయి నొక్కులు నొక్కాడు.
దీన్ని రేవంత్ ఎంతో చాకచక్యంగా వినియోగించుకున్నాడు. ఒక రకంగా చెప్పాంలంటే తప్పంతా అద్దంకి దయాకర్ మీద తోతేసి, తన తప్పేం లేదన్నది తేల్చేశాడు. అంటే రేవంత్ ఎటు వైపైనా రాజకీయం చేయగలడని రుజువు చేసుకున్నాడు. రెడ్డి, రెడ్డి ఒకటే గాని అద్దంకి దయాకర్ వేరు అని నిరూపించాడు. ఇది పార్టీలో ఎలాంటి సంకేతాలను పంపిస్తుందన్నది కూడా ఆలోచించకుండానే రేవంత్ ఈ వ్యాఖ్యలు చేశారని అనుకోలేం. ఎంకి పెల్లి సుబ్చి చావుకొచ్చిందని రేవంత్ రెడ్డి చెప్పిన క్షమాపణ నేను చూడలేదని, అద్దంకి దయాకర్ను పార్టీనుంచి శాశ్వతంగా సస్పెండ్ చేస్తే తప్ప తాను పార్టీ కోసం ఆలోచించను. అంటూ వెంకటరెడ్డి మరో కొత్త రాగం అందుకున్నాడు. ఇది కూడా వెంకటరెడ్డి అనకుండా వుండలేరని అందరికీ తెలిసిందే… ఒక రోజంతా తనను పార్టీ పట్టించుకోవడం లేదన్న మాటలను మాట్లాడుతున్న వెంకటరెడ్డిని మరోసారి బోనులోకి పిలవడం అంటే, ఏమిటో రేవంత్ మరో రాజకీయం చేస్తే గాని తత్వం ఆయనకు పూర్తిగా బోధపడేలా లేదు. సీనియర్లు వుండొద్దన్నదే రేవంత్ లెక్క. ఆయనకు ఎదురుండొద్దన్నదే రేవంత్ రాజకీయం. తన మాటకు విలువ ఇవ్వని వాళ్లను పార్టీకి దూరం చేయడమే రేవంత్ లక్ష్యంగా పెట్టుకొని రాజకీయం చేస్తున్నాడు. మొత్తంగా తనకు ఎదురులేని రాజకీయాలు చేయాలన్న కసితో రేవంత్ పని చేస్తున్నాడు. ఒక రోజంతా రేవంత్ను అన్ని మీడియాల్లో తిట్టిన తిట్టు తిట్టకుండా తిట్టిన కోమటి రెడ్డి వెంకటరెడ్డి చేసిన అన్ని వ్యాఖ్యలకు రేవంత్ ఒక్క మాటతో సమాధానం చెప్పాడు. సారీ అని చెప్పేశాడు. మొహమాటానికి వెళ్లకుండా బేషరుతుగా రేవంత్ క్షమాపణ చెప్పేశాడు. వెంకటరెడ్డిని డైలమాలో పడేశాడు. నిజానికి వెంకటరెడ్డి ఇది ఊహించింది కాదు. రేవంత్ ఒక మెట్టు దిగి వస్తాడని ఆయన అసలే ఊహించలేదు. ఎలాగైనా రేవంత్ తన విధానంలో మార్పు తెచ్చుకున్నట్లు నటిస్తాడని కూడా ఆలోచించలేదు. ఇప్పుడు బంతి మళ్లీ వెంకటరెడ్డి కోర్టులోకి వెళ్లింది. ఇక కాంగ్రెస్ రాజకీయాల్లో పాలు పంచుకోకపోతే వెంకటరెడ్డిదే తప్పు అవుతుంది. తమ్ముడికి వ్యతిరేకంగా వెంకటరెడ్డి ముందుకు వెళ్లలేడు…పార్టీని కాదని వెనక్కి వెళ్లలేడు. కాకపోతే వెంకటరెడ్డి తమ్ముడికి వ్యతిరేకంగా రాజకీయాలు చేస్తాడని ఎవరూ అనుకోవడం లేదు. ఇది రేవంత్కు కూడా బాగా తెలుసు. అందుకే కోరికోరి రేవంత్ చేత క్షమాపణ అడుక్కున్న వెంకటరెడ్డిని బాగానే ఇరికించాడు. మరోసారి వెంకటరెడ్డి గిలగిలలాడేలా చేశాడు. 1980 నుంచి రాజకీయాల్లో , వ్యాపారాల్లో వున్న తమకు జూబ్లీహిల్స్లో 400 గజాల్లో ఇల్లుంటే…రేవంత్కు 4000 గజాల్లో ఇల్లెలా వుందని ప్రశ్నించిన వెంకటరెడ్డి అదే మాట మీద నిలబకుండా చేశాడు. ఒక ఎస్పీ, హోంగార్డుకు క్షమాపణ చెప్పాల్సివస్తే చెబుతానని రేవంత్ నిరూపించుకున్నాడు. సీనియర్లందరి నోరు ఒకేసారి మూయించేశాడు. తనదైన రాజకీయం ఆడేందుకే రేవంత్ నిర్ణయించుకున్నాడు. సీనియర్లెవరైనా సరే…తన గీతలో వుండాల్సిందే అంతే….ఇక్కడ రేవంత్ అంతే…లేకుంటే రాజకీయంగా అందరి అంతే..! పెదవిలో నవ్వు కళ్లల్లో కసి రెండూ ఏక కాలంలో చూపి వెంకన్న రాజకీయాన్ని డైలమాలో పడేశాడు…అద్దంకి దయాకర్ను బలిచేస్తారా? లేక వెంకటరెడ్డి సంగతి తెలిసిందే అని వదిలేస్తారా? అన్నది మాత్రం ఇప్పటికప్పుడు సస్పెన్స్….
