జైపూర్, నేటి ధాత్రి :
మంచిర్యాల జిల్లా కేంద్రంలో చెన్నూరు మాజీ శాసనసభ్యుడు మంచిర్యాల జిల్లా బీఆర్ఎస్ పార్టీ అధ్యక్షుడు బాల్క సుమన్ ఆధ్వర్యంలో తన స్వగృహంలో గురువారం రోజున పార్లమెంట్ ఎన్నికల సన్నాహక సమావేశాన్ని నిర్వహించారు. ఈ సదస్సులో మందమర్రి మున్సిపాలిటీ మరియు మండలం, జైపూర్ మండలం, క్యాతనపల్లి మున్సిపాలిటీ లోని బీఆర్ఎస్ పార్టీ ప్రజా ప్రతినిధులు, ముఖ్య నాయకులు, కార్యకర్తలు పాల్గొన్నారు.ఈ సందర్భంగా బాల్క సుమన్ మాట్లాడుతూ పార్లమెంటు ఎన్నికల ప్రచారంలో అధిష్టానం ఆదేశాల ప్రకారం అనుసరించాల్సిన విధి విధానాలను గురించి, సోషల్ మీడియా ద్వారా ప్రజల్లో మమేకమై పోతూ అవగాహన కల్పించే విధానాన్ని గురించి సూచనలు సలహాలు ఇవ్వడం జరిగింది. అలాగే మే 4 వ తేదీన బీఆర్ఎస్ పార్టీ అధినేత కేసిఆర్ మంచిర్యాల జిల్లా పర్యటనను,రోడ్ షోలను విజయవంతం చేయుటకై నాయకులకు, కార్యకర్తలకు దిశానిర్దేశం చేశారు. రానున్న ఎన్నికల్లో పెద్దపల్లి బీఆర్ఎస్ పార్టీ పార్లమెంటు అభ్యర్థి కొప్పుల ఈశ్వర్ ని భారీ మెజారిటీతో గెలిపించేలా సమన్వయంతో సీనియర్ నాయకులు, కార్యకర్తలు అందరూ సాయశక్తుల కృషి చేయాలని పిలుపునిచ్చారు.
