ఈ ధరలేంది? ఆ పన్నుల మోతలేంది?

ధరలు తగ్గే మార్గమే లేదా?

ఇలా నడ్డివిరుస్తూ అలా అధికారంలోకి వస్తామంటే భావ్యమేనా?

ప్రజల కొనుగోలు శక్తి తగ్గుతుంటే కనిపించడం లేదా? 

అర్ధాకలితో కాలం వెల్లబుచ్చుతుంటే పాపం అనిపించడం లేదా?

రాజరికంలోనైనా ప్రజలు సుబిక్షంగా వున్నారా? అని రాజులు తెలుసుకునేవారట!

కళ్లముందు ప్రజల కష్టాలు చూస్తూ స్పందించని నాయకులను ప్రజలు ఆదరించాలా?

ఓట్లు కావాలి? గద్దెనెక్కాలి? ప్రజల నడ్డివిరవాలి?

తెలంగాణలో జరిగినంత అభివృద్ధి దేశంలో ఎక్కడైనా జరిగిందా? 

బిజేపి పాలిత ప్రాంతాల్లో కనీసం నిరంతర కరంటు వుందా?

కాంగ్రెస్‌ పాలిత ప్రాంతాల్లో రైతుబంధు అమలౌతుందా?

ఆసరా పించన్లు రూ.2వేలు ఇస్తున్నారా?

కళ్యాణలక్ష్మి వంటి ఫథకాలున్నాయా?

రుణమాఫీ పేరుతో ఈ పథకాలను మాయం చేయాలని చూస్తున్నారా?

దళిత బంధు ఎలా సాధ్యమని ప్రశ్నించిన కాంగ్రెస్‌కు రుణమాఫీ ఎలా సాధ్యమో చెప్పాలి?

రాజకీయ దండయాత్రలు కాదు…ధరా ఘాతాలు తగ్గాలి?

జనం గోడు రాజకీయ పార్టీలకు పట్టాలి.

చిత్తం శివుని మీద రాజకీయం అధికారం మీద అన్నట్లుంది బిజేపి, కాంగ్రెస్‌ల పరిస్ధితి. 

నటించడం నేర్చుకున్న నాయకులు ఎప్పుడూ కళ్లు మూసుకొనే వుంటారని సామెత. మంచి జరిగితే మేం చేస్తున్న యాగమంటారు? నష్టం జరిగితే, ప్రజలు ఇబ్బందులు పడుతుంటే చలించకుండా వుంటారు? ఎందుకంటే తిప్పలు పడేది జనం. నేతలు కాదు? అందుకే ప్రజల కష్టాలు వారికి పట్టవు? ఎంత సేపు రాజకీయాలు? ఎన్నికలు? గెలుపులు? ప్రభుత్వాలు? వస్తే అదిస్తాం? ఇదిస్తాం? అవన్నీ అమలు చేసేందుకు పన్నులతో నడ్డి విరుస్తాం? ఇదేనా పాలనంటే? వినిమయం పోయి, వినియోగం అన్న పదం తెచ్చి చేర్చిన నాయకులకు ప్రజల గోడు తెలియకుండా పోతోంది? ఏమిటీ ధరలు? ఎందుకీ వాతలు? ఏమిటీ పరిస్ధితులు? తినడం కష్టమే అయితే జనం బతికేదెలా? వారి బతుకులకు మెతుకెలా? ఎంత సేపు అంతార్జాతీయ మార్కెట్‌ పేరు చెప్పుకుంటూ గడ్డు కాలం ఎల్లకాలం గడుపుతూనే వుందామా? ప్రపంచ మార్కెట్‌ను బూచీగా చూపి అర్ధాకలితో బతికేస్తూనే వుందామా? ఇంత కాలమైనా నిత్యావసర వస్తువుల మీద పరాయిదేశాల మీదే ఆధారపడి బతుకుతూ పోదామా? సన్నుల వాతలు ,ధరల మోతలు, దినదిన గండాలు తప్ప, సామాన్యుడి దిక్కేలేదా? తినేదెలా?బతికేదెలా? అది ఎవరూ ఆలోచించడం లేదు? కాని మేం పాలిస్తాం? మేమే పాలిస్తాం? కేంద్రంలో మేమే వుంటాం. రాష్ట్రాల్లోనూ మేమే పరిపాలనచేస్తాం? బాగానే వుంది? ప్రజల ఆశీస్సులు వుంటే ఎవరైనా గెలుస్తారు? ప్రజలకు మేలైన పాలన అంటే సంక్షేమం రాజ్యమేలాలి. సంక్షోభం కాదు. కుడుపునిండా తిండి, కంటినిద్ర ప్రజల కల్పిస్తే, వాళ్లు ఆరోగ్యంగా వుంటారు. ఆరోగ్యవంతమైన సమాజం నిర్మిస్తారు. పొద్దుందాక కష్టం చేయాలి? వచ్చిన డబ్బుతో ఆకలి తీర్చుకోవాలి. అందుకు చేసిన కష్టమంతా ఖర్చు పెట్టాలి. చేసిన కష్టమంతా ఒక్క రోజు తిండికే పోతే మనిషి మనగడ ఎంత దుర్భరం. 

                          మళ్లీ మర్నాడు తెల్లారే పని బాట పట్టాలి. ఇక మనిషికి తీరికేది. మనసుకు సుఖమేది? వెట్టి చాకిరీ చేసిన కాలంలో కూడా ప్రజలు ఇంతగా బాధపడి వుండకపోవచ్చ మాటలే సర్వత్రా వినిపిస్తున్నాయి. సగటు జనం ఏది కొనలేని పరిస్దితి. ఏది తిన లేని పరిస్ధితి. పెట్రోలు ధరలు అలా నిత్యావసర వస్తువులు ఇలా…ఆఖరకు ఆరోగ్యం కోసం వాడేమందుల ధరలు కూడా పెంచితే ఇక బతుకున్న వారు జీవచ్చవాలుగా మారడం తప్ప మరేమౌతుంది. ప్రభుత్వాలకు ఎందుకు పట్టడంలేదు. దేశంలో వున్న బిజేపి పాలిత రాష్ట్రాలకు పట్టడం లేదు. ప్రతిపక్షాలకు చెందని పార్టీలు కూడా అనేక రాష్ట్రాలలో పాలన సాగిస్తున్నాయి కదా! ఆ పార్టీలు ఎందుకు మాట్లాడడం లేదు? వాళ్ల ప్రజలకు ధరలు పెంచుకుంటూ పోవడాన్ని ఎందుకు ప్రశ్నించలేకపోతున్నారు? తప్పనిసరై ప్రజలు ప్రశ్నిస్తే తప్ప, నాయకులు కదల్లేరా? రాజకీయ పార్టీలు ముందుకు రావా? తెలంగాణ రాష్ట్ర సమితి, ముఖ్యమంత్రి కేసిఆర్‌, మంత్రులు కేటిఆర్‌, హరీష్‌రావులు అంతో ఇంతో కేంద్రాన్ని నిలదీస్తున్నారు. కాని మిగతా రాష్ట్రాలలో ఆ చలనం లేదు. కాకపోతే ఇక్కడో విషయం చెప్పుకోవాలి. ఎనమిది సంవత్సరాల కాలంలో తెలంగాణలో జరిగినంత ప్రగతి అన్నది దేశంలోని ఏ రాష్ట్రంలోనూ జరగలేదు. ఇది ముమ్మాటికీ సత్యం. ఇక అప్పుల బూచీ చూపి రాష్ట్ర ప్రభుత్వాన్ని విమర్శించే బిజేపి కేంద్రంలో చేసిన అప్పుల గురించి కూడా చెప్పాలి. అందుకు కొన్ని సాక్ష్యాలు చెప్పుకుంటేనైనా ప్రజల్లో కూడ ఆలోచన వస్తుంది. దేశంలో ఏ రాష్ట్రంలో లేనంతగా నిరంతర విద్యుత్‌ తెలంగాణలో అమలౌతుంది. పట్టణాల నుంచి మొదలు పల్లెల దాకా నిరంతర విద్యుత్‌ సరఫరా అవుతోంది. కాని ఈ సరఫరా దేశంలో ఏ రాష్ట్రంలోనూ లేదు. పైగా వ్యవసాయానికి మొత్తంగా ఉచిత విద్యుత్‌ ఎక్కడా అందించడం లేదు. కాని ఒక్క తెలంగాణలోనే అమలౌతోంది. దేశంలోని ఏ రాష్ట్రంలో ఎనమిదేళ్ల కాలంలో పెద్దఎత్తున సాగునీటి ప్రాజెక్టుల నిర్మాణం జరగలేదు. 

                              పొరుగు రాష్ట్రమైన మరో తెలుగు రాష్ట్రం ఆంధ్రప్రదేశ్‌లో పొలవరం నిర్మాణం ఎంత నత్తనడకన సాగుతుందో ప్రత్యేకంగా చెప్పాల్సిన పని లేదు. పోలవరం, కాళేశ్వరం దాదాపు ఏక కాలంలో ప్రారంభమైంది. పోలవరం జాతీయ ప్రాజెక్టు. కాని కాళేశ్వరానికి కేంద్రం జాతీయ హోదా ఇవ్వలేదు. అంటే ఒక్క రూపాయి ఇవ్వలేదు. కాని పోలవరం అక్కడే ఆగిపోయింది. సగం పనులు కూడా పూర్తి కాలేదు. కాని కాళేశ్వరం మొత్తం పూర్తయింది. ఆ ప్రాజెక్టు స్టేజీలన్నీ నీటిసరఫరా చేస్తున్నాయి. ప్రపంచంలోనే అతి పెద్దఎత్తిపోతల ప్రాజెక్టు కాళేశ్వరం. అంతే కాదు అంత తక్కువ సమయంలో బహుళార్ధక ప్రాజెక్టు ప్రపంచంలో ఎక్కడా పూర్తి కాలేదు. కాని తెలంగాణ చేసి చూపించింది. దానిని ఆధారం చేసుకొని అనేక రిజర్వాయర్ల నిర్మాణం పూర్తయింది. ఒకనాడు నీటి చుక్క జాడలేని తెలంగాణలో ఎక్కడ చూసినా నీటి పరవళ్లే…పల్లెల్లో పచ్చదనమే…ఇది తెలంగాణ ప్రజలక తెలియడం లేదా? ఈ మధ్య కాంగ్రెస్‌ పార్టీ ప్రకటించిన వరంగల్‌ డిక్లరేషన్‌ అంటుంటే ఆసక్తిగా చూస్తున్న రైతులకు, అరవైఏళ్లు పాటు తెలంగాణ ఎండబెట్టింది కాంగ్రెస్‌కాదా? పాలించినంత కాలం, అభివృద్ధి చేయాల్సినంత కాలం, అవకాశం వున్నా తెలంగాణలోని చెరువుల్లో తట్టెడు మట్టి తీయని పార్టీ కాంగ్రెస్‌ కాదా? కాంగ్రెస్‌ పార్టీ రైతుకు ఏక కాలంలో రెండు లక్షల రుణ మాఫీసాధ్యమా? ఎలాగైనా ఆచరణ సాధ్యం కాని హమీలు ఇచ్చి, అధికారం కోసం పాకులాడడం తప్ప కాంగ్రెస్‌ ప్రకటనల్లో నిజాయితీ వుందా? కాంగ్రెస్‌ పార్టీ అధికారంలో వున్న రాష్ట్రాలలో రైతు రుణమాఫీ ఏక కాలంలో పూర్తి చేశారా? అక్కడ రైతులు రుణాలు తీసుకోలేదా? మరి వారి గురించి ఎందుకు ఆలోచించడం లేదు? ఇక పెరుగుతున్న ధరలపై పోరాటం లేదు. వాటిని అడ్డుకోవడం లేదు. కాని అధికారంలోకి వస్తే అరచేతిలో వైకుంఠం చూపిస్తామని చెప్పడం మాత్రం అందరూ నేర్చుకున్నారు. తెలంగాణలో దళిత బంధు అమలుకు డబ్బు ఎక్కడినుంచి తెస్తారని ప్రభుత్వాన్ని ప్రశ్నిస్తున్న కాంగ్రెస్‌ ఏక కాలంలో రైతులకు రుణమాఫీకి ఎక్కడినుంచి డబ్బులు సమకూర్చుతారో కూడా చెప్పాలి కదా! కాని దేశంలో ఏ రాష్ట్రంలో లేని రైతు బంధు వంటి స్కీమ్‌ తెలంగాణలో అమలౌతుందన్న సంగతి కాంగ్రెస్‌ మర్చిపోవద్దు. ఇక బిజేపి లెక్కలే వేరు…క్షేత్రస్ధాయిలో వాటికి విలువే లేదు. ఇటీవల బిజేపి రాష్ట్ర అధ్యక్షుడు బండి సంజయ్‌ ముందు మహిళల ఏకరువు పెట్టిన విషయాలు చూస్తే అర్ధమౌతోంది. బిజేపి నేతల వద్ద ఆ సమాధనాం లేదు. 

                           తెలంగాణ రాష్ట్రంలో అధికార తెలంగాణ రాష్ట్ర సమితి ప్రభుత్వంపై బండి సంజయ్‌ నిందల మీద నిందలేస్తున్నారు. మేమే ఎంతో మేలు అని మభ్యపెట్టే ప్రయత్నం చేస్తున్నారు. దాంతో అందుకున్న అక్కడున్న మహిళలు నూనెల ధరలేంది? ఉప్పుపప్పు ఎట్లా కొనాలే? గ్యాస్‌ ధర గంతైతే ఎట్లా? మేమేం తినాలే? లేనొళ్ల సంగతి ఏంది? అంటూ ప్రశ్నల మీద ప్రశ్నలు వేసిన మహిళలకు సమాధనం చెప్పలేక బిక్క మొహం వేయడం బండి వంతైంది. ఆ ప్రశ్నించిన మహిళలకు సమాధానం చెప్పలేక, చెప్పడానికి ఏమీ లేక, ధరల పెరుగుదలపై నోరు మెదపలేక ఒక్కసారిగి దిక్కులు చూడడం మొదలు పెట్టారు. అప్పుడే బండి సంజయ్‌కు అనిపించొచ్చు. ఇన్ని రోజులు తన ప్రజాసంగ్రామయాత్ర వల్ల పార్టీకి ఒరిగేదేమీ లేదన్న తెలిపోయినట్లైంది. ముందు పెరుగుతున్న ధరలకు కళ్లెం వేయలేరు. కాని అధికారంలోకి వస్తామంటే ప్రజలు సరే అంటారా? స్వాగతిస్తారా? ఎప్పుడో అమాసకో, పున్నానికో అన్నట్లు ఆరు నెలలో, ఏడాదికో పైసల్లో పెట్రోలు ధరలు పెరిగితే దేశమంతా ఉద్యమాలు జరిగేవి. ఏ విధమైన పన్నులు వేయాలన్న ప్రభుత్వాలు నానా రకాలుగా ఆలోచించేవారు. తప్పనిపరిస్ధితుల్లో పెరిగినా, మళ్లీ ప్రజాగ్రహానికి గురై తగ్గించేవారు. దేశాన్ని అవరై ఏళ్లు పాలించిన కాంగ్రెస్‌ పార్టీ ఇలా ధరలతో ప్రజలను నడ్డి విరిచే పరిస్దితి వుంటే, అంత కాలం పాలన సాగించేది కాదు? రాక రాక బిజేపికి అవకాశం రెండుసార్లు ప్రజలు ఇచ్చారు. మెరుగైన పాలన చేయమన్నారు. పేద ప్రజలకు అండగా నిలవమన్నారు. కాని ఇలా ఖాయిలా పరిన పరిశ్రమల పేరుతో లక్షల కోట్ల విలువైన స్థలాలు ప్రైవేటు వ్యక్తులకు అడ్డికి పావుసేరు అప్పగించడాలను ప్రజలు సమర్ధిస్తారా? ఈ ఎనమిదేళ్ల కాలంలో కేంద్రంలో అధికారంలో వుండి ఏ ఒక్క జాతీయ సాగునీటి ప్రాజెక్టు నిర్మాణం చేశారా? 

                           దేశంలో మెరుగైన వైద్యం కోసం ఎన్ని ఎయిమ్స్‌ నిర్మాణం చేశారా? మేకిన్‌ ఇండియా అన్నారే గాని, ఎన్ని ఐఐటిలు స్ధాపించారు. ఇవి కదా? ప్రగతి అంటే…పెంచిన, పెరిగిన ధరలను ప్రజలు తట్టుకుంటూ, వస్తు వినియోగం జరుగుతోందంటేనే ప్రగతి అనుకునే వాళ్లు పాలిస్తే, ప్రజల పరిస్ధితి ఇలాగే వుంటుంది. కొనుగోలు శక్తి అంటే, పొదుపు లేకపోవడం కాదు? మొత్తం జేబు ఖాళీ చేసుకోవడమే కొనుగోలు శక్తికి నిదర్శనం కాదు..? రేపటి కోసం మనిషి నిశ్చితంగా వున్నప్పుడే ప్రగతి. అంతే కాని రేపటి కోసం కూడా ఇప్పటినుంచే పరుగెత్తే పరిస్ధితిని స్ధిరత్వం అనలేరు…ఆర్ధిక సుస్ధిరతకు తావు లేదు. నిత్యావసర వస్తువుల కొనుగోలకే సగటు మనిషి కష్టపడుతుంటే విలాసవస్తువులు ఎలా కొనుగోలు చేస్తాడు? సంతోషంగా ఎప్పుడు జీవిస్తాడు? ఓటు వేసిన పాపానికి కష్టం కొనితెచ్చుకున్నానని ప్రజలు బాధపడని రోజే నిజమైన పండగ.