వేసవి సెలవుల్లో పిల్లలతో అనుబంధం పెంపు లక్ష్యం
ఈ నెల 23న రాష్ట్రవ్యాప్తంగా తల్లిదండ్రులు–ఉపాధ్యాయుల సమావేశాలు
సమావేశాలకు తల్లిదండ్రుల 100 శాతం హాజరు లక్ష్యం
జిల్లా విద్యాశాఖాధికారి బి. రంగయ్య నాయుడు
నేటిధాత్రి ప్రతినిధి,వరంగల్ జిల్లా:
పాఠశాల విద్యాశాఖ మార్గదర్శకత్వంలో ఈ నెల తల్లిదండ్రులు–ఉపాధ్యాయుల సమావేశాలను (పీటీఎంలు) ఈనెల 23న రాష్ట్రవ్యాప్తంగా నిర్వహించనున్నట్లు జిల్లా విద్యాశాఖాధికారి బి. రంగయ్య నాయుడు తెలిపారు. “వేసవి సెలవుల సమయంలో పిల్లలతో అనుబంధాన్ని పెంపొందించడం” అనే అంశంతో ప్రభుత్వ, స్థానిక సంస్థ పాఠశాలలు, కేజీబీవీలు, టీజీ మోడల్ పాఠశాలల్లో ఈ సమావేశాలు జరుగనున్నాయి.ఈ సందర్భంగా జిల్లాలోని అన్ని ప్రభుత్వ పాఠశాలల ప్రధానోపాధ్యాయులు, ప్రిన్సిపాల్స్
సమావేశాలను క్రమబద్ధంగా నిర్వహించాలని డీఈవో సూచించారు. తల్లిదండ్రులకు ముందుగానే లిఖితపూర్వక ఆహ్వానాలు పంపించి 100 శాతం హాజరు సాధించాలని, గతంలో హాజరు కాని తల్లిదండ్రులపై ప్రత్యేక దృష్టి పెట్టాలని ఆదేశించారు. గ్రామీణ ప్రాంతాల్లో వ్యవసాయం, పట్టణాల్లో ఉద్యోగాల దృష్ట్యా తల్లిదండ్రులకు అనుకూల సమయాల్లో సమావేశాలు నిర్వహించాలని ఆయన తెలిపారు.పాఠశాల విద్యా అనువర్తనం ద్వారా అవసరమైన పీటీఎం వనరులను ముందుగానే డౌన్లోడ్ చేసుకుని, సమావేశం వివరాలను అనంతరం అనువర్తనంలో నమోదు చేయాలని పేర్కొన్నారు. విద్యార్థుల నమోదు మరియు హాజరు మెరుగుదలకు తల్లిదండ్రుల సహకారం తీసుకోవాలన్నారు. పాఠశాల అభివృద్ధి కార్యక్రమాల్లో వారిని భాగస్వాములుగా చేర్చాలని సూచించారు. సమావేశం కార్యవివరాలు నమోదు చేసి, ఫోటోలతో పాటు అనువర్తనంలో అప్లోడ్ చేయాలని తెలిపారు. మండల, జిల్లా, రాష్ట్ర స్థాయి అధికారులు సమావేశాలను పర్యవేక్షించనున్నట్లు పేర్కొన్నారు.
వేసవి సెలవులపై విద్యాశాఖ సూచనలు..
వేసవి సెలవులను సద్వినియోగం చేసుకునేందుకు విద్యార్థులు ప్రతిరోజూ పునశ్చరణ చేయడం, పుస్తక పఠనం అలవాటు చేసుకోవడం, నైపుణ్యాలను అభివృద్ధి చేసుకోవడం అవసరమని సూచించారు. తగిన ఆహారం, నీరు తీసుకోవడం, అధిక వేడి సమయంలో జాగ్రత్తలు పాటించడం ముఖ్యమని డీఈవో అన్నారు.పిల్లల చదువు, ఆరోగ్యం, క్రమశిక్షణపై తల్లిదండ్రులు ప్రత్యేక శ్రద్ధ వహించాలని జిల్లా విద్యాశాఖ అధికారి రంగయ్య నాయుడు విజ్ఞప్తి చేశారు.
