‘డైలాగ్ కింగ్’ అంటే సాయికుమార్
నటుడు సాయికుమార్ పేరు తలచుకోగానే ఆయన వాచకమే ముందుగా గుర్తుకు వస్తుంది. సాయికుమార్ గళం నుండి జాలువారిన పదాలు ప్రేక్షకుల మదిలో చెరిగిపోని స్థానం సంపాదించాయి.నటుడు సాయికుమార్ పేరు తలచుకోగానే ఆయన వాచకమే ముందుగా గుర్తుకు వస్తుంది. సాయికుమార్ గళం నుండి జాలువారిన పదాలు ప్రేక్షకుల మదిలో చెరిగిపోని స్థానం సంపాదించాయి. అందుకే జనం ఆయనను ‘డైలాగ్ కింగ్’ అన్నారు. 1960 జూలై 27న జన్మించిన సాయికుమార్ తండ్రి పి.జె.శర్మ తెలుగు సినిమారంగంలో నటునిగా సాగారు. తన దరికి చేరిన పాత్రల్లో నటిస్తూ, ఎంతోమంది పరభాషా నటులకు తన వాయిస్ ను అరువిస్తూ శర్మ పయనించారు. అదే తీరున ఆయన పెద్దకొడుకైన సాయికుమార్ సైతం సాగడం విశేషం!
తెలుగులోనూ సాయికుమార్ కు కొన్ని సినిమాల్లో హీరోగా నటించే ఛాన్స్ దక్కింది. తన చిన్న తమ్ముడు అయ్యప్ప పి.శర్మ దర్శకత్వంలో ‘ఈశ్వర్ అల్లా’ సినిమా నిర్మించారు సాయి. ఆయన పెద్ద తమ్ముడు రవిశంకర్ కూడా బాలనటునిగా రాణించి, తరువాత అన్నలాగే డబ్బింగ్ ఆర్టిస్ట్ గా అలరించారు. ఆ పై విలన్ కేరెక్టర్స్ లోనూ ఆకట్టుకున్నారు రవిశంకర్.
ప్రస్తుతం సాయికుమార్ కేరెక్టర్ యాక్టర్ గా సాగుతున్నారు. తన దరికి చేరిన ప్రతీ పాత్రకు న్యాయం చేయాలనే తపిస్తున్నారు. ఒకప్పుడు సుమన్, రాజశేఖర్, రజనీకాంత్ వంటి నటులకు తన గాత్రంతో వారి పాత్రలకు వన్నె తీసుకు వచ్చారు సాయికుమార్. తాను నటునిగా బిజీ అయిన తరువాత సాయికుమార్ డబ్బింగ్ అంతగా చెప్పడం లేదు. అయినా ఈ నాటికీ సాయికుమార్ అనగానే తెలుగు ప్రేక్షకులు ‘డైలాగ్ కింగ్’ అంటూ గుర్తు చేసుకుంటూ ఉంటారు. మధ్యలో రాజకీయాల్లోనూ కొంతకాలం పయనించిన సాయి కుమార్ ప్రస్తుతం పూర్తిగా నటనలోనే సాగుతున్నారు.