TVK కింగ్ మేకర్ అవుతుందా?
విజయ్ ఫ్యాన్స్ హ్యాపీయేనా?
తమిళనాడు రాజకీయ రణక్షేత్రం ఇప్పుడు ఒక హై-వోల్టేజ్ సినిమాను తలపిస్తోంది. బాక్సాఫీస్ రికార్డులను తిరగరాసిన స్టార్ హీరో విజయ్, ‘తమిళగ వెట్రి కళగం’ పార్టీతో పొలిటికల్ ఎంట్రీ ఇవ్వడమే దీనికి ప్రధాన కారణం. అభిమానులు అప్పుడే తమ దళపతిని సీఎం కుర్చీలో ఊహించుకుంటున్నారు, పైగా ఈసారి పోలింగ్ శాతం భారీగా పెరగడంతో అదంతా విజయ్ మేనియానే అని గాల్లో మేడలు కట్టేస్తున్నారు. అయితే, వివిధ సంస్థలు విడుదల చేసిన ఎగ్జిట్ పోల్స్ మాత్రం ఫ్యాన్స్ అంచనాలపై నీళ్లు చల్లుతున్నాయి.
ప్రస్తుత అంచనాల ప్రకారం, విజయ్ పార్టీకి 10 నుంచి 20 సీట్లు రావొచ్చని విశ్లేషకులు భావిస్తున్నారు. ఒకవేళ ఆ సంఖ్య 20 దాటితే అది రాజకీయ అద్భుతమే అవుతుంది. నిజానికి విజయ్ తొలి ప్రయత్నంలోనే కింగ్ అవ్వడం కంటే, కనీసం 40 స్థానాలు సాధించి ‘కింగ్ మేకర్’గా మారి తదుపరి ప్రభుత్వాన్ని శాసించాలని భావించారు. కానీ ఎగ్జిట్ పోల్స్ చూస్తుంటే ఆ అవకాశం కూడా చేజారిపోయేలా కనిపిస్తోంది, ఇది ఖచ్చితంగా ఆయన మద్దతుదారులను నిరాశకు గురిచేసే విషయమే.
కానీ ఈ ఫలితాలను కేవలం ఒక కోణంలోనే చూడటం సరికాదు. సుదీర్ఘ రాజకీయ చరిత్ర, బలమైన క్యాడర్ కలిగిన ద్రవిడ పార్టీల మధ్య, ఎలాంటి పొత్తులు లేకుండా తొలిసారి స్వతంత్రంగా పోటీ చేసి 20 స్థానాల వరకు దక్కించుకోవడం అంటే అది సామాన్యమైన విషయం కాదు. ఇది విజయ్ సుదీర్ఘ రాజకీయ ప్రస్థానానికి కేవలం ఒక చిన్న అడుగు మరియు పటిష్టమైన పునాది మాత్రమే. ఈ ఎన్నికల ద్వారా తనకు వచ్చే ప్రతి సీటు భవిష్యత్తులో విజయ్ కింగ్ లేదా కింగ్ మేకర్గా ఎదగడానికి ఒక మెట్టుగా మారుతుంది. ఏది ఏమైనా ఇవి కేవలం ఎగ్జిట్ పోల్స్ అంచనాలు మాత్రమే అని, బాక్సాఫీస్ హిట్ల మాదిరిగానే రిజల్ట్ రోజున ఓటర్లు ఇచ్చే తీర్పు అంచనాలకు అందకుండా ఉంటుందని అభిమానులు ఇప్పటికీ ధీమా వ్యక్తం చేస్తున్నారు. ఆ అద్భుతం జరిగి విజయ్ నిజంగానే కింగ్ మేకర్గా అవతరిస్తారో లేదో తెలియాలంటే ఫలితాల రోజు వరకు వేచి చూడాల్సిందే.