పీఎస్ఎల్వీ-సీ62 రాకెట్ ప్రయోగంలో సాంకేతిక లోపం.. శాటిలైట్తో తెగిన సంబంధాలు
పీఎస్ఎల్వీ-సీ62 రాకెట్ ప్రయోగంలో సాంకేతిక లోపం తలెత్తింది. నాలుగో దశలో శాటిలైట్తో సంబంధాలు తెగిపోయాయి. 18 నిమిషాల్లోనే పూర్తి కావాల్సిన ప్రయోగం సాంకేతిక లోపం కారణంగా ఆలస్యం అవుతోంది.
ఇంటర్నెట్ డెస్క్: ఇస్రో ప్రతిష్ఠాత్మకంగా చేపట్టిన పీఎస్ఎల్వీ-సీ62 రాకెట్ ప్రయోగంలో సాంకేతిక లోపం తలెత్తింది. నాలుగో దశలో శాటిలైట్తో సంబంధాలు తెగిపోయాయి. 18 నిమిషాల్లోనే పూర్తి కావాల్సిన ప్రయోగం సాంకేతిక లోపం కారణంగా ఆలస్యం అవుతోంది. ప్రయోగంపై ఇస్రో ఛైర్మన్ నారాయణన్ మాట్లాడుతూ.. ‘పీఎస్ఎల్వీ-సీ62 రాకెట్ ప్రయోగానికి అంతరాయం ఏర్పడింది. ప్రయోగం మూడో దశ వరకు సాఫీగా సాగింది. మూడో దశ తర్వాత సాంకేతిక లోపం ఏర్పడింది. సాంకేతిక సమస్యపై విశ్లేషిస్తున్నాం’ అని అన్నారు.తిరుపతి జిల్లా శ్రీహరికోటలోని సతీష్ ధావన్ స్పేస్ సెంటర్-షార్ నుంచి పీఎస్ఎల్వీ-సీ62 రాకెట్ నింగిలోకి దూసుకెళ్లింది. ఈ రోజు(సోమవారం) ఉదయం 10:18 గంటలకు రాకెట్ ప్రయోగం జరిగింది. కొత్త ఏడాదిలో ఇస్రో చేపట్టిన తొలి ప్రయోగం ఇదే కావటం విశేషం. పీఎస్ఎల్వీ-సీ62 రాకెట్ అధునాతన భూపరిశీలన ఉపగ్రహం ఈవోఎస్-ఎన్1తో పాటు మరో 15 చిన్న ఉపగ్రహాలను నింగిలోకి తీసుకెళ్లింది. అయితే, సాంకేతిక లోపం కారణంగా మూడవ దశ తర్వాత శాటిలైట్తో సంబంధాలు తెగిపోయాయి. సాంకేతిక సమస్యను పరిష్కరించడానికి ఇస్రో శాస్త్రవేత్తలు ప్రయత్నిస్తున్నారు.ఈవోఎస్-ఎన్ 1ను వాతావరణ మార్పులు, పర్యావరణ పరిశోధన నిమిత్తం కక్ష్యలోకి పంపుతున్నారు. దీంతోపాటు పంపే మిగతా 15 ఉపగ్రహాలనూ ధృవ కక్ష్యలోకి రాకెట్ ప్రవేశపెడుతుంది. వీటిలో 8 విదేశీ ఉపగ్రహాలున్నాయి. వీటితో భారత్ నుంచి ఇప్పటి వరకు ప్రయోగించిన విదేశీ ఉపగ్రహాల సంఖ్య 442కు చేరుతుంది. ఇక, ఈ ప్రయోగానికి సంబంధించిన కౌంట్డౌన్ 22 గంటల ముందు అంటే.. ఆదివారం మధ్యాహ్నం 12.17 గంటలకు ప్రారంభమైంది. పీఎస్ఎల్వీ-సీ 62 ప్రయోగం విజయవంతం కావాలని ఇస్రో చైర్మన్ డాక్టర్ వి.నారాయణన్ శనివారం శాస్త్రవేత్తలతో కలిసి తిరుమల శ్రీవారిని, శ్రీకాళహస్తీశ్వర స్వామిని, సూళ్లూరుపేటలోని చెంగాళమ్మ అమ్మవారిని దర్శించుకున్నారు. శ్రీవారి పాదాల చెంత ఉపగ్రహం నమూనాను ఉంచి పూజలు చేశారు.