“ఎంజీఎం” లో జూనియర్ డాక్టర్ల తీరుపై విమర్శలు..!
రిపోర్టర్లపై బెదిరింపులు? వాట్సాప్ గ్రూపుల్లో ఆరోపణలు?
వరంగల్, నేటిధాత్రి.
ప్రభుత్వ ఆసుపత్రి అయిన ఎంజీఎం హాస్పిటల్లో ఇటీవల జరిగిన ఒక ఘటన నేపథ్యంలో కొందరు జూనియర్ డాక్టర్ల వ్యవహార శైలిపై విమర్శలు వినిపిస్తున్నాయి. ముఖ్యంగా ఒక సంఘటనకు సంబంధించి వాట్సాప్ గ్రూపుల్లో ఒక సీనియర్ రిపోర్టర్ పేరు ప్రస్తావిస్తూ మెసేజ్లు షేర్ అయినట్లు సమాచారం వెలువడటంతో ఈ విషయం చర్చనీయాంశంగా మారింది.
సమాచారం ప్రకారం ఇటీవల ఎమర్జెన్సీ విభాగంలో జరిగిన ఒక ఘటనకు సంబంధించి “ఒక సీనియర్ రిపోర్టర్కు సంబంధించిన వ్యక్తులు వచ్చి డాక్టర్లతో వాగ్వాదానికి దిగారు” అనే విధంగా కొందరు జూనియర్ డాక్టర్లు తమ వాట్సాప్ గ్రూపుల్లో మెసేజ్లు పెట్టినట్లు తెలిసింది.
అయితే సంఘటనపై పూర్తి వివరాలు తెలియకుండానే ఒక రిపోర్టర్ పేరు ప్రస్తావిస్తూ ప్రచారం జరగడం ఎంతవరకు సమంజసం అన్న ప్రశ్నలు కొన్ని వర్గాల నుంచి వినిపిస్తున్నాయి.
ఇక ఆ రోజు జరిగిన సంఘటనపై మరో కోణం కూడా వినిపిస్తోంది. రాత్రి సుమారు 11 గంటల సమయంలో ఒక సీనియర్ రిపోర్టర్కు ఫోన్ ద్వారా సమాచారం అందిందని, తనకు తెలిసిన వ్యక్తికి రోడ్డు ప్రమాదం జరిగి ఆసుపత్రి ఎమర్జెన్సీ విభాగానికి తీసుకువచ్చారని, అక్కడ సరైన స్పందన లేదని చెప్పడంతో ఆయన ఆసుపత్రికి చేరుకున్నట్లు తెలిసింది. ఆ సమయంలో అక్కడ నెలకొన్న గొడవ పరిస్థితులను వీడియోగా చిత్రీకరించినట్లు సమాచారం.
ఈ విషయాన్ని సంబంధిత ఉన్నతాధికారుల దృష్టికి కూడా తీసుకెళ్లినట్లు తెలుస్తోంది.
అయితే ఆ తరువాత కొందరు జూనియర్ డాక్టర్ల వాట్సాప్ గ్రూపుల్లో జరిగిన సంభాషణలకు సంబంధించిన కొన్ని స్క్రీన్షాట్లు బయటకు వచ్చినట్లు ప్రచారం జరుగుతోంది. దీనిపై వరంగల్కు చెందిన కొందరు రిపోర్టర్లు అభ్యంతరం వ్యక్తం చేసినట్లు సమాచారం.
ఇక మరోవైపు ఎంజీఎం ఆసుపత్రిలో రిపోర్టర్లు ఫోటోలు, వీడియోలు తీయకుండా కొందరు అడ్డుకుంటున్నారనే ఆరోపణలు కూడా వినిపిస్తున్నాయి. అయితే గతంలో జరిగిన రివ్యూ సమావేశంలో రాష్ట్ర మంత్రి కొండా సురేఖ ప్రభుత్వ గుర్తింపు కార్డు (అక్రిడిటేషన్) కలిగిన రిపోర్టర్లు ప్రజలకు సంబంధించిన అంశాలను కవర్ చేయడానికి ఆసుపత్రిలో ఫోటోలు, వీడియోలు తీసుకోవచ్చని పేర్కొన్న విషయం గుర్తుచేస్తున్నారు.
ఈ నేపథ్యంలో ఆసుపత్రిలో జరిగిన ఘటనపై స్పష్టత రావాలని, వాస్తవాలు బయటకు రావాల్సిన అవసరం ఉందని పలువురు అభిప్రాయపడుతున్నారు. అలాగే ఇలాంటి వివాదాలు తలెత్తకుండా సంబంధిత అధికారులు సమన్వయంతో సమస్యలను పరిష్కరించాల్సిన అవసరం ఉందని స్థానిక వర్గాలు సూచిస్తున్నాయి.
అయితే ఈ ఆరోపణలపై జూనియర్ డాక్టర్ల స్పందన తెలియాల్సి ఉంది. అధికారులు ఘటనపై సమగ్రంగా పరిశీలించి వాస్తవాలు వెల్లడించాలని పలువురు కోరుతున్నారు.