నిత్యం ఇదే తంతు: ఎట్లా సార్

మల్కాజ్గిరి (మేడ్చల్ మల్కాజిగిరి జిల్లా) (నేటిధాత్రి):

ప్రతి మనిషికి జీవితంలో తాను చేసేది కరెక్ట్ అని భావిస్తారు. ఎదుటివారు ఏమైతే నాకేంటి అనే ఆలోచన. ఈ మాటలకు ఉదాహరణ మల్కాజిగిరి నియోజకవర్గం జిహెచ్ఎంసి కార్యాలయం పరిధిలోని కొంతమంది వ్యవహరిస్తున్న తీరు. జిహెచ్ఎంసి కార్యాలయం పక్కన మేడ్చల్ మల్కాజిగిరి జిల్లా ప్రభుత్వ ఆసుపత్రి, నిత్యం పేద ప్రజలకు అత్యవసర సేవలు అందిస్తోంది. అయితే ఈ ఆస్పత్రికి చేరుకోవాలంటే జిహెచ్ఎంసి కార్యాలయం ఎదుట అడ్డగోలుగా నిలిపిన వాహనాలు దాటుకుని, అలాగే ఇరుకు సందుల్లో నిర్వహిస్తున్న వారాంతపు సంతను దాటుకుని ఆస్పత్రికి చేరుకోవాలి. ఆ సమయంలో రోగికి ఏమైనా జరగరానిది జరిగితే ఎవరు బాధ్యత వహిస్తారు. పలుమార్లు స్వచ్ఛంద సంస్థలు ట్రాఫిక్ సిబ్బందికి ఈ సమస్య విన్నవించిన, కేవలం ఆ సమయాన హడావిడి చేసి ట్రాఫిక్ సిబ్బంది తమ చేతులు దులుపుకుంటున్నారు. ఎక్కడో రోడ్లపై వాహనాలు ఆగితే చాలాన్ విధించే ట్రాఫిక్ సిబ్బంది ప్రాణాలు అరచేతిలో పెట్టుకుని ఆసుపత్రికి వచ్చే దారిలో అడ్డగోలుగా వాహనాలు నిలిపే వారిపై ఎందుకు చర్యలు తీసుకోవడం లేదని పలు స్వచ్ఛంద సంస్థలు అడగకనే అడుగుతున్నారు. ఇప్పటికైనా ట్రాఫిక్ సిబ్బంది మరియు జిహెచ్ఎంసి అధికారులు ప్రభుత్వ ఆసుపత్రికి వచ్చే దారిలో ఎటువంటి వాహనాలు నిలప కుండా తగు జాగ్రత్తలు తీసుకోవాలని పేద ప్రజలు కోరుతున్నారు.